Рэдакцыя Hrodna.life звярнулася да чытачоў з просьбай пра падтрымку

Галоўны рэдактар выдання чацверты месяц працуе як валанцёр.

Фота: pexels.com

Гродзенскі інфармацыйны партал Hrodna.life апублікаваў зварот да чытачоў з просьбай фінансава падтрымаць выданне. Каб працягнуць працу, рэдакцыі патрэбны грошы.

«Вы можаце сказаць, што беларускія медыі павінны эканоміць і больш эфектыўна выкарыстоўваць сродкі. Мы ўжо гэта робім. Мы аптымізуем працэсы, дзелім кошты з калегамі дзякуючы супольным праектам, абмяжоўваем выдаткі. Наш галоўны рэдактар ужо чацвёрты месяц працуе як валанцёр. Большасць нашай каманды — шматстаночнікі і зарабляюць на іншых працах, але не кідаюць гэтай, бо лічаць яе важнай для мясцовай супольнасці.

Вы можаце сказаць, што беларускія медыі павінны навучыцца самі зарабляць. Мы, наколькі гэта магчыма, працуем з рэкламадаўцамі і забяспечваем частку сваёй працы продажам рэкламы. І гэта не надакучлівая банерка на паўэкрана, а якасна зробленая натыўка: цікавыя рэдакцыйныя матэрыялы з інтэграцыяй рэкламных элементаў.

Але гэтага ўсё яшчэ не хапае для стабільнай працы», — гаворыцца ў звароце.

Журналісты адзначаюць, што дзякуючы падтрымцы чытачоў у красавіку яны ўжо змаглі закрыць 4% ад штомесячных патрэб. 

Усе магчымыя спосабы падтрымкі рэдакцыі Hrodna.life — па спасылцы

«Дзякуй за любую дапамогу! Нават невялікая ваша падтрымка лепш, чым яе адсутнасць! Мы верым у вас — і вы не пакідайце нас!» — піша Hrodna.life.